Belarus Prezidenti Aleksandr Lukashenko Ukraina rahbariyatini tinchlik bo‘yicha takliflarni rad etmaslikka chaqirdi. Uning ta’kidlashicha, davom etayotgan mojaro yanada keskinlashib, Kiyev butun mamlakat ustidan nazoratni yo‘qotishi mumkin.
Lukashenkoning so‘zlariga ko‘ra, Ukraina prezidenti Vladimir Zelenskiy nafaqat muzokaralar olib borishi, balki taqdim etilgan shartlarni ham jiddiy ko‘rib chiqishi lozim. U, xususan, Donald Tramp tomonidan Vashingtonga olib ketilgan va muhokama qilinayotgan tinchlik tashabbusiga to‘xtaldi.
“Agar ukrainaliklar bu taklifni qabul qilmasa, vaziyat yanada og‘irlashadi. Bunday holda ular butun Ukrainani boy berib qo‘yishi mumkin”, – dedi Belarus rahbari.