Oliy Majlis Qonunchilik palatasining majlisida «Soliq va byudjet siyosatining 2024 yilga mo‘ljallangan asosiy yo‘nalishlari qabul qilinganligi munosabati bilan O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida»gi qonun loyihasi ko‘rib chiqildi.
2024-yilning 1-yanvaridan boshlab yuridik shaxslardan olinadigan mol-mulk solig‘ining asosiy stavkasini (1,5 foiz) saqlab qolgan holda, soliq bazasini aniqlashda 1 kv.M uchun o‘rnatilgan minimal qiymat indeksatsiya qilinmoqda.
Toshkent shahri uchun mol-mulk solig‘i – 3 mln so‘m (amalda 2,5 mln so‘m), Nukus shahri va viloyat markazlari uchun – 2 mln so‘m (amalda 1,5 mln so‘m), boshqa shaharlar va qishloq joylar uchun – 1,2 mln so‘m (amalda 1 mln so‘m)ni tashkil etadi.
Shuningdek, qonun loyihasi bilan resurs soliqlarining o‘z vaqtida to‘lanishini taʼminlash maqsadida soliq to‘lovchining shaxsiy kabineti, uyali telefon raqamiga va soliq organlarining maxsus mobil ilovasiga SMS-xabarnoma shaklida soliqni to‘lash to‘g‘risida xabarnoma yuborish tartibi kiritilmoqda.
Eslatib o‘tamiz, avvalroq mol-mulk va yer solig‘iga hisoblangan penya summalari hisobdan chiqarilishi bo‘yicha Prezident qarori imzolangandi.
