Rossiyaning “Aeroflot” aviakompaniyasining AFL236 yo‘lovchi reysi Moskvadan Goa yo‘nalishi bo‘yicha uchayotgan vaqtida mast holatda zo‘ravonlik qilgan yo‘lovchi sabab Urganch xalqaro aeroportidagi muqobil aerodromga kelib qo‘nishga majbur bo‘ldi. Ekipaj samolyot bortiga militsiya xodimlarini so‘ragan.
Bortida 356 yo‘lovchi bo‘lgan Boeing 777-300 samolyoti mahalliy vaqt bilan 20:29 da favqulodda qo‘nishni amalga oshirdi. Zo‘ravon yo‘lovchi reysdan olindi. Yaqin soatlarda havo kemasi Urganchdan manzil aeroportiga parvozini davom ettiradi.