Sog‘liqni saqlash vazirligi O‘zbekistonda mustaqillik bayrami tadbirlarini o‘tkazish tartiblari belgilangani haqida maʼlum qildi.
Respublika maxsus komissiyasi tomonidan O‘zbekiston Respublikasi davlat mustaqilligining 30 yillik bayrami tadbirlarini ko‘tarinki ruhda o‘tkazish maqsadida Qoraqalpog‘iston Respublikasi, viloyatlar va Toshkent shahrida ochiq maydonlarda sayillar, konsert tomoshalari va ko‘ngilochar dasturlarni tashkil etish borasidagi tegishli tashkilotlar tomonidan berilgan takliflar maʼqullangan.
«Mustaqillikning o‘ttiz yilligi bayramiga tayyorgarlik ko‘rish va uni yuqori saviyada o‘tkazishni taʼminlashga masʼullar tomonidan bayram tadbirlariga tashrif buyuruvchilar niqob taqishlari, ijtimoiy masofa saqlashlari, shaxsiy gigiyena qoidalariga qatʼiy rioya etish ustidan nazoratini kuchaytirishni taʼminlash shartligi belgilandi.
Shu o‘rinda Sog‘liqni saqlash vazirligi bayram tadbirlari o‘tkaziladigan maydonlarda, shuningdek, tashkilot, korxona, muassasalarda, yirik savdo majmualari, supermarketlar, ko‘ngilochar muassasalarda niqobda bo‘lish, ijtimoiy masofani saqlash, tana haroratini o‘lchash amaliyotlariga rioya etilishini so‘rab qoladi», deyiladi SSV matbuot xizmati xabarida.