Namangan viloyatining Chust tumanida 26 aprel kuni masjid yonidagi ehson qutisi ichida bo‘lgan pullar o‘g‘irlab ketildi. Bu haqda viloyat IIB axborot xizmati xabar berdi.
Holat Chust tuman “Sadacha” MFY hududida joylashgan “Katta bog‘” jome masjidi yonida yuz bergan. 26 apreldan 27 aprelga o‘tar kechasi nomaʼlum shaxslar masjid tashqarisida joylashgan ehson qutisini buzib ochib, uning ichida bo‘lgan taxminan 3 ml so‘m pullarni olib qochgan.
Olib borilgan tezkor qidiruv ishlari davomida ehson qutisi ichidagi pullarni Chust tumanda yashovchi 2006 yilda tug‘ilgan 4 nafar voyaga yetmagan shaxslar olib qochganligi aniqlangan. Ularning yonidan bir yuz sakson besh ming so‘m miqdoridagi pullar ashyoviy dalil sifatida olingan. Hozirda tergovga qadar tekshiruv ishlari olib borilmoqda.