Hozirda Adliya vazirligi va tilshunos olimlar elektron lug‘at va mobil ilovani yaratish ustida ish olib bormoqda.
Adliya vazirligi tashabbusi va taklifiga ko‘ra O‘zbek tili va adabiyoti universiteti hamda Fanlar akademiyasining bir guruh olimlari tomonidan o‘zbek ismlarining elektron imlo lug‘atini yaratish ustida ish olib borilmoqda.
Qayd etilishicha, ushbu loyiha milliy qadriyatlarga mos ismlarni ommalashtirish maqsadida amalga oshirilmoqda.
Shuningdek, ism qo‘yish jarayonda fuqarolarga qulaylik yaratish, ismlarning maʼnosi va yozilishidagi o‘ziga xosliklarni eʼtiborga olish masalalari ham dolzarb hisoblanadi.
Ushbu loyiha fuqarolarga ism tanlashda, FHDYO organlari xodimlariga esa ismlarni qayd etish va o‘zgartirish jarayonlarida muhim tayanch manba bo‘lishi nazarda tutilgan.
"Loyiha muddati rejaga ko‘ra iyul oyigacha. Yana ish bitishi va sifatiga qaraymiz. "Til tur" aksiyasi davomida hududlarda o‘rganish o‘tkazilganda, FHDYO organlarida va umuman fuqarolarda ham ismlar imlosi va izohi aks etgan elektron lug‘atga ehtiyoj borligi aniqlandi. Chunki ko‘p yangi ismlar kirib kelmoqda, lotin alifbosiga o‘tildi. Ismlarning lotin alifbosi va ingliz tilida yozilishi qanday bo‘ladi degan savollar ko‘p beriladi. Shu sababli biz tashabbus bilan chiqdik, olimlar tashabbusimizga labbay deb javob berishdi, hozirda shu loyiha qilinyapti”, —deydi Adliya vazirligi matbuot kotibi Sevara O‘rinboyeva.
Ushbu elektron lug‘atda ismlarning o‘zbek tili lotin alifbоsida hamda ingliz tilida yozilishi va maʼnosi (izohi) aks etadi. Lug‘at FHDYO elektron tizimiga integratsiya qilinadi.