Qoraqalpog‘istondagi Quyi Amudaryo biosfera rezervati inspektorlari tomonidan 11-iyun kuni xalqaro va O‘zbekiston Qizil kitobiga kiritilgan Buxoro bug‘usini noqonuniy ovlagan brakonyer qo‘lga olindi.
Aniqlanishicha, Quyi Amudaryo davlat biosfera rezervati inspektorlariga 11-iyun kuni hududda oʻq ovozi eshitilganligi toʻgʻrisida xabar kelib tushgan. Inspektorlar voqea joyiga yetib borishganida oq rangli Matiz hududdan chiqib ketganligi aniqlangan.
Shundan so`ng mashina izidan quvib, Gurlan tumanigacha borgan inspektorlar brakonyerni qo`lga olgan. Huquqbuzarning mashinasi ko`zdan kechirilganda Buxoro bugʻusining boʻlaklangan jasadi topilgan. Gumonlanuvchining yonidan protsessual tartibda ikki dona ov miltigʻi, bir dona Buxoro bugʻusi tana qismlari rasmiylashtirib olingan.
Buxoro bugʻusini noqonuniy ovlash orqali huquqbuzar tomonidan tabiatga 99 million so‘m zarar yetkazilgan. Hozirda mazkur holat yuzasidan surishtiruv ishlari olib borilmoqda.