Bugun Prezident Shavkat Mirziyoyev Fransiya taraqqiyot agentligi bosh ijrochi direktori Remi Riuni qabul qildi.
Yangi Sheriklik dasturi va "yo‘l xaritasi" doirasida Fransiya taraqqiyot agentligi bilan ko‘p qirrali hamkorlikni kengaytirishning amaliy jihatlari ko‘rib chiqildi.
Bugungi kunda O‘zbekiston agentlikning yetakchi hamkoridir. Xususan, “Yashil” iqtisodiyot, kommunal sohani, shu jumladan suv taʼminoti tarmoqlarini modernizatsiya qilish, energetika infratuzilmasini rivojlantirish, chorvachilik va boshqa yo‘nalishlarda loyihalar amalga oshirilmoqda. Qo‘shma loyihalar portfeli o‘tgan yilda o‘ttiz foizga oshib, hozirda 1,3 milliard dollarni tashkil qilmoqda.
Uchrashuvda biznesni qo‘llab-quvvatlash dasturlarini ilgari surish, davlat-xususiy sheriklikning samarali mexanizmlarini joriy etish, agentlikning “PROPARKO” va “Ekspertiz Frans” tuzilmalari bilan hamkorlik qilish masalalari muhokama markazida bo‘ldi.