Shveytsariya hukumati ag‘darilgan Venesuela rahbari Nikolas Maduro va uning yaqin sheriklariga tegishli barcha aktivlarni “darhol kuchga kirishi bilan” to‘rt yillik ehtiyot chorasi sifatida muzlatish qarorini qabul qildi. Hujjatda aniq miqdor ko‘rsatilmagan va hozirgi kunda Shveytsariyada barcha aktivlar mavjudligi tasdiqlanmagan. Bu haqda Euronews xabar qilmoqda.
Federal Kengash bayonotida aytilishicha, qaror “hozirgi vaziyatda noqonuniy ravishda qo‘lga kiritilgan har qanday aktivlarning Shveytsariyadan tashqariga chiqarilmasligini ta’minlash” maqsadida qabul qilingan. Ushbu muzlatish amaldagi Venesuela hukumati a’zolariga ta’sir qilmaydi, lekin kelajakdagi sud jarayonlarida aktivlarning noqonuniy olinganligi aniqlansa, Shveytsariya ularning Venesuela xalqiga foyda keltirishiga harakat qiladi.
3 yanvar kuni Maduro AQSh kuchlari tomonidan Karakasda hibsga olinib, giyohvand moddalar savdosi va narkotrafik bilan bog‘liq ayblovlar asosida Qo‘shma Shtatlarga olib ketilgan edi. Shveytsariya 2018 yildan beri Venesuelaga qarshi sanksiyalarni joriy qilgan, AQSh, Kanada va Yevropa Ittifoqi esa 2017 yildan beri Karakas bilan savdo qilishga sanksiyalar qo‘llagan.
Shveytsariyaning xususiy bank sektori siyosiy faol shaxslar va yuqori xavfli mijozlar boyligini saqlash joyi sifatida ko‘p marotaba tilga olingan. Bu esa mamlakatning barqaror bank tizimi va tarixiy maxfiylik tufayli aktiv egaligini aniqlashni murakkablashtiradi.