Bugun, 18-yanvar kuni Sirdaryo viloyatining Boyovut tumanidagi xonadonlardan birida yong‘in chiqdi. Holat yuzasidan viloyat Favqulodda vaziyatlar boshqarmasi maʼlumot berdi.
Qayd etilishicha, soat 15:20 da Boyovut tumani “Qarapchi” MFY hududidagi 7-uyda taxminan havo-gaz aralashmasining chaqnashi bilan bog‘liq hodisa sodir bo‘lgan.
Hodisa oqibatida uyning 50 kvadrat metr maydoni yongan. Ikki nafar fuqaro yengil tan jarohati olib, shifoxonaga yuborilgan.
Voqea joyga yong‘in-qutqaruv ekipajlari soat 15:28 da yetib borib, yong‘in 16:30 da to‘liq o‘chirilgan. Hozirda hodisa sababi va moddiy zarar miqdori aniqlanmoqda.