DXXning xabar berishicha, Andijon viloyatida yashovchi I. U. 2021-2022-yillarda Turkiyada ishlagan davrida Suriyadagi terroristik tashkilot yollovchilarining taʼsiriga tushib, ularning safiga borib qo‘shilishni reja qiladi. Natijada shu maqsadda u bir necha bor Suriyaga o‘tishga uringan, lekin turkiyalik chegarachilar bunga imkon bermagan. Ammo, navbatdagi urinish vaqtida u harbiylar tomonidan qo‘lga olinib, O‘zbekistonga deportatsiya qilingan.
Qayd etilishicha, mazkur shaxs Andijonga qaytib kelganidan keyin ham ijtimoiy tarmoqlar orqali terroristik tashkilot aʼzolari bilan aloqada bo‘lgan.
DXX tomonidan amalga oshirilgan tezkor tadbirlar natijasida I. U. ning noqonuniy harakatlariga chek qo‘yilib, ayblanuvchi 8 yil 1 oy muddatga ozodlikdan mahrum etildi.