Toshkentda bir guruh fuqarolar tomonidan noqonuniy ravishda qum-shag‘al xomashyosi qazib olingani aniqlandi.
Qayd qilinishicha, ekologiya vazirligi nazorat inspeksiyasi hamda Toshkent shahar IIB hamkorligida navbatdagi reyd tadbiri o‘tkazilgan. Toshkent shahri, Yashnabod tumani, "Jarboshi" MFY, Chirchiq daryosida olib borilgan reyd davomida bir guruh fuqarolar tomonidan noqonuniy ravishda ekskavator va yuk mashinalarida qum-shag‘al xomashyosi qazib olingani ma’lum bo‘lgan. Ular tabiatga 139 million so‘m zarar yetkazgan.
Holat yuzasidan 9 ta shaxsga nisbatan MJtKning 1-moddasiga (ma’muriy javobgarlik to‘g‘risidagi qonunchilik) asosan 91 mln so‘m jarima belgilandi. Huquqbuzarlar jami 230 million so‘m to‘laydigan bo‘ldi. Shuningdek, texnika vositalari vaqtinchalik jarima maydoniga joylashtirildi.
Ma’lumot uchun, Prezidentining 14-sonli farmoniga asosan 2024 yil 1 maydan Chirchiq, Sangzor, Zarafshon, Norin, Qashqadaryo, Surxondaryo va Sirdaryo daryolari o‘zanlarida noruda materiallarni qazib olishga muddatsiz moratoriy o‘rnatildi. Ekologiya vazirligi tomonidan hamkor tashkilotlar bilan birga qum-shag‘alni noqonuniy qazib olishga qarshi doimiy reyd tadbirlari olib borilmoqda.
