Ijtimoiy tarmoqlarda Walnut Treye xususiy klinikasi jarrohlarining musiqaga raqs tushib bemorni operatsiya qilayotgani, hushi o‘zida emasligidan foydalanib bemorning og‘zini ochib kameraga olgani aks etgan videolavha tarqaldi.
Bu esa ijtimoiy tarmoq foydalanuvchilari o‘rtasida turli eʼtirozlarga sabab bo‘lmoqda.
"Repost" nashri ushbu vaziyatga munosabat olish uchun klinika direktori, yuz-jag‘ jarrohligi mutaxassisi O‘tkirbek Vohidov bilan bog‘langan.
"Internetda tarqalgan video noto‘g‘ri talqin qilinyapti. Ushbu operatsiyani biz to‘rt soat davomida amalga oshirdik. Operatsiya muvaffaqiyatli yakunlandi. U tugagach, biz musiqa qo‘ydik. Jahon tajribasidan kelib chiqib aytishim mumkinki, ko‘plab jarrohlar operatsiya vaqtida musiqa tinglashadi. Bu sizga diqqatni jamlashga imkon beradi", — degan jarroh.
U, shuningdek, shifokorlar bemor masxara qilishga urinmaganini aytgan.
"Biz hech qanaqasiga bemorning ustidan kulganimiz yo‘q. Chunki bemorlar bizning nomimizni tanitishga, obro‘ orttirishimizga yordam beradi. Biz bunga qanday yo‘q qo‘yishimiz mumkin? Video faqat o‘zim uchun, xorijlik hamkasblarimga ko‘rsatish uchun olingan edi", — deya qo‘shimcha qilgan shifoxona rahbari.
