1-2 апрель кунлари Туркияда парадзюдо бўйича Анталия Гран-Приси ўтказилди. Халқаро турнирда дунёнинг 38 мамлакатидан 200 дан зиёд полвонлар ўз вазн тоифаларида ғолиблик учун татамига тушишди.
Параспортчилар учун муҳим рейтинг очколарини берувчи мазкур турнирнинг дастлабки кунида Ж2 классида 60 кг вазнда Шерзод Намозов ва 73 кгда Учқун Қуронбоевлар барча рақибларини имкониятсиз қолдириб шоҳсупанинг юқори поғонасига кўтарилди.
Навбатдаги кун беллашувлари ҳам вакилларимиз учун омадли ўтди. Жумладан 90 кггача бўлган вазн тоифасида Даурхон Кароматов навбатдаги олтин медални жамоа ҳисобига қўшиб қўйган бўлса яна бир полвонимиз 90 кгдан оғир вазндаги спортчилар ўртасида Аловудди Жўрақулов бронза медалига эга чиқди.
Халқаро турнир якунларига кўра умумжамоа ҳисобида, 38 мамлакат вакиллари орасида парадзюдочиларимиз Чин ўлкаси вакилларидан кейин иккинчи поғонани банд этди. Кучли учликни Бразилия жамоаси якунлаб берди.