Андижон халқаро аэропорти реконструкция ишларидан сўнг яна фаолиятини бошлади. Бу ҳақда Транспорт вазирлиги маълум қилди.
2025 йил 15 март куни соат 10:30 да Андижон аэропорти “Uzbekistan Airways” авиакомпаниясининг Тошкент-Андижон йўналиши бўйича биринчи техник рейсини қабул қилди.
Андижон аэропорти 2023 йил 1 апрель куни аэродром мажмуасини тўлиқ реконструкция ва модернизация қилиш мақсадида ёпилган эди. Учиш-қўниш йўлаги, юриш йўлаклари ва перроннинг эскирганлиги ҳамда замонавий ёритиш тизимининг йўқлиги сабабли кечаси парвозларни қабул қилиш имконияти чекланган эди.
Реконструкция доирасида узунлиги 3300 метр, эни 60 метр бўлган янги 4Э тоифали учиш-қўниш йўлаги қурилди. Шунингдек, битта юриш йўлаги ва учта самолёт тўхташ жойига эга перрон янгиланди.
Янги инфратузилма бир вақтнинг ўзида 10 та самолётга хизмат кўрсатиш ва тунда ҳам парвозларни қабул қилиш имкониятини яратади. Бу эса Андижон ва Фарғона водийсида ҳаво қатновларини сезиларли даражада оширади.
Тез орада Андижон халқаро аэропорти мунтазам йўловчи рейсларини ҳам қабул қилишни бошлайди.
