АҚШда президент Жо Байден томонидан ўзларига тайинланган ўлим жазоси шартли озод этилиш имкониятисиз умрбод қамоқ жазосига ўзгартирилган икки маҳбус тегишли ҳужжатларни имзолашдан бош тортди. Бу ҳақида "NBC News" телеканали хабар бермоқда.
Маҳбусларнинг адвокатлари судга Байденнинг уларга нисбатан қарорини бекор қилиш талаби билан даъво аризасини киритган. Маҳбуслар ўзларининг айбсиз эканини таъкидламоқда. Уларга кўра, ўлим жазосининг умрбод қамоқ жазосига енгиллаштирилиши апеллясия давомида ютиб чиқиш имкониятларини камайтиради.
Қайд этилишича, ўлимга ҳукм этилганлар апеллясияси ҳар доим суд хатоликка йўл қўйган бўлиши мумкинлиги туфайли яхшилаб кўриб чиқилади.
Шу билан бирга, таъкидланишича, ўлим жазоси енгиллаштирилишини бекор қилиш мумкин ёки мумкин эмаслиги, шунингдек, маҳбусларнинг даъвоси бўйича суд қарори қандай бўлиши номаълум. Хусусан, 1927 йилда АҚШ Олий суди маҳкумнинг қатлни тўхтатиб туриш ёки тўлиқ афв этиш учун уларнинг розилиги талаб қилинмайди деган қарорни чиқарган.