Ўзбекистонлик машҳур профессионал боксчи Баҳодир Жалоловнинг навбатдаги жанги бекор қилинди. Бу ҳақда Топ Ранк промоутерлик компанияси ўзининг Х (собиқ Twitter) саҳифасида расмий баёнот берди.
26 июль куни АҚШнинг Нью-Йорк шаҳрида бўлиб ўтиши режалаштирилган жангда Жалолов италиялик рақиби Жанмарко Кардилога қарши рингга чиқиши керак эди. Бироқ Кардило соғлиғи билан боғлиқ муаммолар сабабли жангда қатнаша олмаслиги маълум қилинди.
"Баҳодир Жалолов ва Жанмарко Кардило ўртасидаги оғир вазн тоифасидаги жанг бекор қилинди. Кардило соғлиғи билан боғлиқ муаммолар туфайли жангдан воз кечишга мажбур бўлди", — дейилади Топ Ранк баёнотида.
Маълумот учун, Баҳодир Жалолов шу вақтгача профессионал рингда 15 та жанг ўтказган, уларнинг 14 тасини нокаут билан якунлаган. Фақат бир жангда у очколар ҳисобига ғалаба қозонган.
Сўнгги жангини у 5 апрель куни Остона шаҳрида ўтказган эди. Унда у украиналик боксчи Игор Шевадзутский (12-3, 10 КО)га қарши баҳс олиб бориб, ҳакамлар якдил қарори билан рингни ғолиб сифатида тарк этган.
Ҳозирча Жалоловнинг кейинги жанги қачон ва кимга қарши ўтиши ҳақида расмий маълумот берилмади.