Ижтимоий тармоқларда Сурхондарёнинг Бойсун туманида газ сизиб чиқаётгани акс этган видеолар тарқалди. Энергетика вазирлигининг маълум қилишича, видеодаги ҳолат "М-25" конининг 202-сон қудуғида бир ҳафта олдин кузатилган геологик жараён билан боғлиқ.
Вазирликка кўра, қудуқда аввалдан ёқиб қўйилган олов геологик ўзгаришлар сабаб вақтинча сўнган. Мутахассислар бу ҳолат қисқа муддат ичида барқарорлаштирилгани ва олов қайта ёқилганини билдирди.
Айни вақтда "М-25" конида вазият тўлиқ назорат остида. Барча жараёнлар техник талаблар асосида, мутахассислар кузатувида амалга оширилаётганини расмийлар таъкидлади.
Аввалроқ берилган расмий ахборотга кўра, ҳавога зарарли моддалар тарқалишининг олдини олиш мақсадида газни ёқиб қўйиш амалиёти қўлланилган. Бу усул халқаро саноат хавфсизлиги стандартларига мос бўлиб, атроф-муҳитни ҳимоя қилишда одатий технологик чорадир.