“Чегара билмас шифокорлар” халқаро нотижорат ташкилоти 32 йиллик фаолиятидан сўнг Россия Федерациясини тарк этишини маълум қилди. Ташкилот бунинг сабабини Адлия вазирлигининг ташкилотнинг мамлакатдаги филиалини хорижий нодавлат ташкилотлар реестридан чиқариб ташлаш тўғрисидаги қарори билан изоҳлади.
"Мамлакатдаги дастурларимизни якунлаганимиздан жуда қайғудамиз, чунки тиббий ва гуманитар ёрдамга муҳтож бўлган кўплаб одамлар энди биз кўрсатишимиз мумкин бўлган ёрдамсиз қолади", — дейилади ташкилот баёнотида.
Хабарда ташкилот "имконият бўлса, Россиядаги фаолиятини давом эттиришни исташи" қайд этилган.
Ўтган ой ўрталарида Россия Адлия вазирлиги халқаро гуманитар ташкилотларнинг лицензияларини бекор қилди, бу рўйхатда хусусан, “Чегара билмас шифокорлар” ва “Дунё шифокорлари” ташкилотлари ҳам бор эди.