Жорий йилнинг 12 март куни Чилонзор туманида жойлашган 200-мактаб директори ва инспектор-психологи томонидан мактаб ўқувчилари таҳлил қилиниб, сурункали равишда дарс қолдираётган ҳамда тартиб интизоми яхши бўлмаган ўқувчилардан бирининг отаси фуқаро М.Э. суҳбатга чақиртирилган.
Суҳбат мобайнида мактаб директори ва инспектор-психолог, фуқаро М.Э.га фарзандининг дарсга келмаётганининг сабабларини сўраб, дарсда ўзини тутиши ҳам ўзгариб қолган ҳақида маълумот берилган ва биргаликда шуғулланиш зарурлиги тушунтирилган. Фуқаро М.Э эса ўғлининг хати-ҳаракатларидан жаҳли чиқиб, мактаб маъмурияти билан ҳамкорликда ишлаш ўрнига, аксинча, уларга айбни ағдариб, жанжал кўтарган.
Фуқаро тезкор ҳаракатланувчи гуруҳ ходимлари томонидан туман ИИБга олиб борилган ва унга нисбатан МЖтКнинг 47-моддаси бўйича баённома расмийлаштирилган.