Куни кеча Жиззах вилоятининг Зомин туманида Иккинчи халқаро мақом фестивалига старт берилди. Фестивалнинг очилиш маросимида ўзбек санъатининг бир гуруҳ ижодкорлари, жумладан, Юлдуз Усмонова ҳам чиқиш қилди. Тадбирдан сўнг хонанда интервью бериб, мақомни оммалаштириш борасида ўз фикр-мулоҳазаларини билдириб ўтди.
“Мақом халқнинг дардидан яратилган асарлар ҳисобланади. Бугун мақомни оммалаштириш учун уни замонавий ёшларнинг дарди билан уйғунлаштириб ижро этиш керак. Севгидан, ишдан куйганлар бор, ҳақсизликка учраётганлар бор.. Балки, мақомни ўшаларнинг дарди билан боғлаб ижро этиш керакдир. Мақом ана шу дардлардан яралган қалбларга малҳам бўлиши керак.
Биз мусиқага илмий ёндашишимиз керак. Мақом билан биргаликда эстрадамизни ҳам ривожлантиришимиз керак. Агар шундай бўлмаса, бизга бошқа давлатларнинг эстрадаси кириб келиши мумкин.
Аввалги мақомлар вақти келиб яна тикланмоқда. Мен ижодим давомида Бобораҳим Машраб, Навоий ғазалларидан қўшиқлар яратяпман, халқ уларни ҳам севиб эшитяпти. Менимча, мақом қўшиқларни ижро этишда бироз йўналишни ўзгартириш kerakdir... Шунақа қилиб мақомни ёшлар орасига ҳам олиб кирамиз.
Аслида халқнинг дарди бу - мақом. Шунинг учун бугун санъаткорлар халқнинг дардини куйласа, у мухлиснинг юрагига етиб боради” дейди Ўзбекистон ва Тожикистон халқ артисти Юлдуз Усмонова.