2007 йилнинг кузида матбуотда Каканинг "Милан"ни тарк этиши ҳақидаги миш-мишлар тарқалди. Кейин бразилиялик футболчи ўзини А Cерия ва Бразилия футболининг асосий юлдузи сифатида намойиш этди - у Чемпионлар Лигаси финалида "Ливерпул"дан қасос олди, "Манчестер Юнайтед" дарвозасига ажойиб гол урди ва муносиб тарзда "Олтин тўп"ни қўлга киритди. Бундай ўйинчи ҳар қандай клубнинг орзуси, айниқса, "Реал Мадрид"дек жамоанинг. Мадридликлар Каканинг Анчелотти билан можароси ҳақидаги миш-мишлардан унумли фойдаланмоқчи бўлади ва раҳбариятга таклиф тайёрлайди. Шунда Силвио Берлускони дарров алоқага чиқади. У Кака қолган умрини Миланда ўтказишига қарор қилгани ҳақида гапиради.
Бироқ, орадан икки йил ўтиб, 2009 йилнинг ёзида Берлускони мадридликлар таклифини қабул қилади ва бразилиялик билан хайрлашади. "Биз "Милан" 70 миллион еврони йўқотишига йўл қўя олмаймиз, Каканинг кетишининг асосий сабаби - молиявий муаммолар", - деган клуб вице-президенти Адриано Галлиани. Кака "Милан" инқирозини бир йил аввал содир бўлган глобал молиявий инқироз оқибатлари билан изоҳлайди. Шундай қилиб, футбол 2000 йилларнинг асосий сеҳргарларидан бирини йўқотади. Сабаби шу вақтларда авлодлар алмашинуви жараёни кечаётган эди. Кейинчалик чиққан хабарларга кўра, Каканинг Италиядан кетишига асосий сабаб "Реал Мадрид" президенти лавозимига қайтган Флорентино Перес эди. Перес ҳеч иккиланмасдан яна "Галактикос"ни жонлантиришни бошлайди ва Кака унинг режасининг бир қисми эди.
Каканинг ўзи "Милан"ни тарк этишни хаёлига ҳам келтирмаган. Чунки жамоадан кетишдан фойда йўқ эди: Каканинг ўзи бадавлат оиладан чиққан, пулга муҳтож эмас эди ва унинг клуби доимий равишда юқори ўринлар учун кураш олиб борарди. Аммо Перес топ-5 лиганинг асосий юлдузларини сотиб олишга жиддий киришади. Бироқ, барча янги келган юлдузлар Англиядан трансфер бўлган футболчининг соясида йўқ бўлиб кетишди: ўша йилнинг ёзида Криштиану Роналду Испания пойтахтига кўчиб ўтганди. У бразилиялик футболчига қараганда кўпроқ шов-шувларга келтириб чиқарганди. Юлдузлар билан ишлашни яхши билган ўша вақтдаги "Реал Мадрид" бош мураббийи Мануэл Пеллегрини хурсандлигини яширмади. Кака чилилик мураббий билан тезда тил топишиб кетди ва биринчи ўйинларданоқ ўз ўйинини кўрсата бошлади. Ўшанда ҳам бразилиялик ва Роналду ўртасидаги фарқни сезиш қийин эмас эди. Ўша йили жамоа муваффақиятсизликка учради. Клуб мавсумни совринларсиз якунлайди, чемпионатда "Барселона"га икки очкога ютқазади ва Чемпионлар лигасининг 1/8 финалидан ўта олмайди. Перес ва футболчилар эса дарҳол танқид қилинади. Флорентино бунга жавобан жамоага Пеллегринининг ўрнига Жозе Моуриньони олиб келади. Португалиялик мутахассис эса "Реал"нинг кейинги ўн йилликдаги келажагини белгилаб беради.
Аммо Кака Моуриньо учун керакли футболчига айлана олмади. 2010 йилги жаҳон чемпионатидан сўнг бразилиялик футболчи тиззасидан операция қилинади ва олти ойга сафдан чиқади. Шундан сўнг ярим ҳимоячи футболдан бутунлай воз кечиши ҳақида миш-мишлар тарқалди. Перес таваккал қилишни хоҳламайди ва Жанубий Африкадаги жаҳон чемпионатидаги ўйини билан барчани мафтун этган Месут Ўзилни унинг ўрнига сотиб олади.
Кака майдонга фақат 2011 йилнинг бошида қайтди. Ўзилнинг формасига қарамай, Моуриньо бразилиялик учун жой топиб берди. Кейинги мавсум у 40 та ўйинда 8+16 очко жамғарди. Агар Кака асосий таркибда барқарор ўйинчи бўлмаганини ҳисобга олсак, статистикасини янада яхшилаш учун унда имкон бўлганини кўриш мумкин. Каканинг ўзи ҳам мухлислар каби заҳира футболчиси бўлишни хоҳламади. Бразилиялик футболчидан кўпроқ нарса кутилганди, аммо Жозе унга имконият бермади. Кейинчалик Кака трансферни талаб қила бошлади. Перес унинг кетишига қарши эмасди, лекин бу унинг шартларига кўра содир бўлиши керак эди. Шу тариқа, бразилиялик футболчи фаолиятининг бир йилини бой беради: Жозе ярим ҳимоячини заҳира ўриндиғига михлаб қўяди - дастлабки олти ойда у майдонда борюғи 10-20 дақиқа ҳаракат қилди.
2013 йилнинг ёзида томонлар ажралиш вақти келганини тушунишди. Жозенинг ўрнига эски таниши Карло Анчелотти келди, у Кака билан хайрлашишни афзал кўрди: Перес ва мураббий бир қатор фахрийлар билан хайрлашиб, жамоани янгилашга қарор қилишди. Томонлар шартномани бекор қилишга рози бўлишди. Кака "Реал Мадрид"даги фаолияти ҳақида ғазаб билан гапирди. Бразилиялик футболчининг фикрича, унинг Мадриддаги фаолиятига икки нарса халал берган: жароҳатлар ва Моуриньо.
“Мен уч йил давомида Моуриньони кўпроқ имкониятларга эга бўлишим кераклигига ишонтиришга ҳаракат қилдим. Аммо бу унинг танлови эди ва мен буни назорат қила олмадим."
"Реал Мадрид"дан кейин у "Милан"да бир йил ўйнади ва 32 ёшида АҚШ чемпионатига йўл олди. Эътиборлиси, Каканинг кетиши билан "россонерилар" учун узоқ давом этган инқироз бошланди – ярим ҳимоячи Чемпионлар лигасига чиқа олмагани учун клуб билан шартномасини бекор қилди ва жамоа тўққиз йил давомида турнирда иштирок эта олмади. Испаниядаги тўрт йиллик фаолияти давомида бразилиялик ўзини профессионал сифатида кўрсатди, ички интригаларни юзага келтирмади ва ўзига ажратилган вақтдан унумли фойдаланди. Муаммо шундаки, ярим ҳимоячи миланликлар сафидаги ўйинини кўрсатиши, баҳсларга айнан у нуқта қўйиши кутилган эди. Аммо бу кутилган натижани бермади. Каканинг нафақат "Реал Мадрид"да, балки умуман футболда ҳам етакчиликни Роналдуга "топширгани" рамзий маънога эга ва бу янги авлоднинг келганини англатарди.