Филиппиннинг Кесон провинсиясидаги Реал порти яқинида бортида 134 киши бўлган йўловчи кемаси ёниб кетди. Бу ҳақда Reuters хабар берди.
Дастлабки маълумотларга кўра, кема Риал портидан 500 метр узоқликда ёниб кетган. Ёнғиндан сўнг ваҳима тушган йўловчилар сувга сакрай бошлаган.
Ҳодиса оқибатида 7 киши ҳолок бўлган, яна 7 киши бедарак йўқолган. 6 нафар йўловчи шифохонага ётқизилган. Воқеа жойига қутқарувчилар гуруҳи зудлик билан етиб борган ва ҳозирда қидирув-қутқарув ишлари олиб борилмоқда. Эвакуация қилинган фуқаролардан 23 нафари жароҳатланган.