The Financial Times газетасининг ёзишича, Россия ҳарбийлари радиоэлектрон уруш тизимларидан фойдаланишда ҳамон устунликка эга ва улардан муваффақиятли фойдаланмоқда. Жумладан, Ғарбнинг HIMARS тизимларидан учирилган кўплаб ракеталарни уриб туширишда радиоэлектрон тизимлардан фаол фойдаланилмоқда. Бу ҳақда нашр Украина ва Ғарб экспертларининг фикрига таяниб ёзмоқда.
Мақолада таъкидланишича, ҳар икки томон ҳам радиоэлектрон уруш тизимларини ишлаб чиқишга катта маблағ сарфлаб келади, бироқ Москва бу ишни яхшироқ бажаряпти. Бунинг сабаби сифатида Россиянинг ушбу турдаги тизимларга Украинага кенг миқёсли босқин бошланишидан олдин ҳам эътибор қаратгани келтирилмоқда.
FT журналистлари, шунингдек, Украина Қуролли кучлари Бош штабида электрон ва кибер уруш учун масъул полковник Иван Павленко билан ҳам суҳбатлашган.
Павленконинг сўзларига кўра, Россия радиоэлектрон уруш тизимларидан Украинанинг HIMARS ракеталари ва Excalibur артиллерия снарядлари каби аниқ қуролларни йўқотиш учун ҳам фойдаланади. Шунингдек, Москва ушбу тизим ёрдамида Украина армиясини чалғитиб, ўзининг жойлашувини билдирувчи сохта нишонлар яратмоқда ва шунинг ортидан Украинанинг ҳаво мудофааси жойлашувини аниқламоқда.
Ўз навбатида, Украина ҳам ўзининг радиоэлектрон уруш тизимларини ишлаб чиқаришни кўпайтиряпти ва Ғарбдан бундай жиҳозларни етказиб беришда ёрдам беришни сўрайди, деб ёзади нашр.
Хусусан, украиналик ҳарбийлар тез орада Украина Қуролли кучларида фойдаланиши режалаштирилаётган F-16 қирувчи самолётлари замонавий радиоэлектрон уруш тизимлари билан жиҳозланишини таъкидламоқда.
Киев, шунингдек, ўз операцияларини амалга ошириш учун Россия радиоэлектрон уруш тизимларининг айрим заиф томонларини топишга муваффақ бўлган. Украинанинг Россия ҳудудидаги нишонларга, шу жумладан Кремлга берилган муваффақиятли зарбалари шулар жумласидандир, дейилади мақолада.
Газета, шунингдек, Украина Қуролли кучлари Севастополда Россия Қора денгиз флоти кемаларига ҳужумлар пайтида душманнинг радиоэлектрон тизимларини чалғитишга муваффақ бўлганини қўшимча қилади.