“Катта еттилик” (G7) давлатлари Хитойнинг ядро арсеналини тез суръатларда кенгайтираётганидан хавотир билдирди ва уни стратегик хавфларни камайтириш учун шаффофликни оширишга чақирди. Бу ҳақда Канаданинг Квебек провинциясида бўлиб ўтган G7 ташқи ишлар вазирларининг учрашуви якунлари бўйича эълон қилинган баёнотда айтилди.
G7 расмийлари Хитой ҳарбий кучини ошираётганини ва ядровий қуролланишни жадаллаштираётганидан хавотирда эканини таъкидладилар. Улар Пекинни ядро барқарорлигини таъминлаш ва глобал хавфсизликни мустаҳкамлаш йўлида шаффоф музокараларга қўшилишга чақирдилар.
Сўнгги йилларда Хитой ядро қуроллари сонини ошириб, глобал қуролланиш мусобақасида фаол иштирок этаётгани ҳақида халқаро хавотирлар ортиб бормоқда. G7 давлатлари Пекиннинг бу борадаги ҳаракатлари минтақавий ва глобал барқарорликка таҳдид солиши мумкинлигини таъкидламоқда.