Ўзбекистон Республикаси Президенти Шавкат Мирзиёев Шенчжен шаҳридаги тадбирлар доирасида Ипак йўли фонди раиси Чжу Сзюн билан учрашув ўтказди. Фонд 2014 йилда Хитой Халқ Республикаси Раиси Си Сзинпин ташаббуси билан “Бир макон, бир йўл” лойиҳаси доирасидаги савдо-иқтисодий ва инвестисиявий ҳамкорликни молиявий қўллаб-қувватлаш мақсадида ташкил этилган. Учрашувда саноат кооперацияси ва инфратузилмани ривожлантиришни молиявий қўллаб-қувватлаш учун фонд билан биргаликда яратилган инвестисия платформаси имкониятларини фаол ишга солиш орқали истиқболли лойиҳаларни амалга ошириш борасидаги режалар кўриб чиқилди.