“Ла Газзетта делло Спорт” нашри катта янгиликни эълон қилди: манбага кўра, “Рома” бош мураббийи Жозе Моуриньо Португалия терма жамоасини бошқариши мумкин. Қайд этилишича, Моуриньо бу таклифга қизиқмоқда.
У 2020 йил интервьюларининг бирида шундай деганди:
“Ҳа, мен терма жамоани бошқармоқчиман, жаҳон чемпионати ва Европа чемпионатида иштирок этиш тажрибасини олишни, қисқа мусобақалар ҳиссиётларини бошдан кечиришни истайман”, — деганди португалиялик мураббий.
Моуриньо келажакда Португалия терма жамоасини бошқариши кераклиги ҳақидаги гаплар узоқ вақтдан бери давом этмоқда. Жозе дунёнинг энг яхши мураббийи мақомини йўқотгани учун бу вариант фаолиятидаги ягона нажот ҳисобланмоқда.
Халқаро футбол тактик инновациялар бўйича клуб футболидан ортда қолмоқда. Моуриньонинг ўзи ҳозир кўпроқ консерватив ҳолатда. У аввалги усулларни кўп қўллайди. Жозе яқинда мураббийлар штабини янгилади, ёш мутахассисларни таклиф қилди (масалан, “Лилл”дан Жоау Сакраменто Жозе билан “Тоттенҳем”да, ҳозир эса “Рома”да ишламоқда), лекин унинг ўзи ҳам янги тенденцияларга мос келмаяпти. Терма жамоаларда ҳам мураббийнинг яхши мотиватор ва нотиқ бўлиши муҳим роль ўйнайди. Бу компонентда Моуриньода жиддий камчиликлар бор.
Бошқалар Жозенинг Португалия терма жамоасига келиши ҳақида қандай фикрда? Терма жамоанинг амалдаги бош мураббийи Фернандо Сантос 2021 йилнинг апрель ойида ўзидан кейин Моуриньони кўришни истаётганини таъкидлаган эди: “Менинг лойиҳам 2024 йилгача давом этиши керак, ўша вақтгача ўзимни бунга бағишлайман. Аммо бундан кейин Жозе Моуриньо яхши ўринбосар бўларди, деб ўйлайман”, — деганди мураббий.
Манише
Португалия терма жамоасининг собиқ ярим ҳимоячиси
“Моуриньо қўлга киритган барча ютуқлардан сўнг, бу лавозимга жуда мос келади. Жозе дунёнинг энг яхши клубларини бошқарди. Унвонларни қўлга киритди ва унга терма жамоалардаги ғалабалар етишмаяпти. У қийинчиликларга тайёр бўлган тажрибали мураббий. У португал ва хориж футболини билади, ёшлар билан ишлашни истайди”.
Яна бир муҳим савол: Моуриньо Криштиану Роналду билан қандай ишлайди? Аввалроқ, 37 ёшли ҳужумчи терма жамоадаги фаолиятини якунлаш ниятида эмаслиги ҳақида хабар берилганди. Роналду формага тушса, барибир терма жамоага фойда келтириши мумкинлигига ишонмоқда.
Криштиану Моуриньо билан биргаликда 2010 йилдан 2013 йилгача “Реал”да биргаликда ишлаган. Бу вақт ичида уларнинг муносабатлари турли босқичлардан ўтди: биринчи мавсумда ҳаммаси жойида эди, аммо ҳамкорликнинг охирида келишмовчиликлар пайдо бўлди.
Роналду мадридликларнинг ўйин услубидан норози эди: “Йўқ, менга услубимиз ёқмайди, лекин қандай бўлмасин талаб қилинадиган нарсага мослашишим керак. Бизнинг стратегиямиз ишламаяпти”, — деган футболчи.
Жозенинг “Реал Мадрид”даги иккинчи мавсумида ҳаммаси яхши ўтди: жамоа 100 очко билан Испания чемпионлигини қўлга киритди. Моуриньо Роналдуни “гол урувчи машина” деб атади. Аммо кейинги йили вазият ёмонлашди. Мураббий ва футболчи мавсумнинг ёмон ўтгани ва футболга қарашлари турлича бўлгани учун бир-бирига жуда кўп даъволар қилишди. Жанжаллардан бирида Моуриньо ва Роналду уришиб кетишига сал қолган. Натижада 2012/2013 йилги мавсум якунида Моуриньо Мадридни тарк этади.
“Менда у билан боғлиқ битта муаммо бор эди. Мураббий ўйинчини тактик нуқтаи назардан танқид қила олади, имкони бор нарсани яхшилашга ҳаракат қилади. Бироқ Криштиану танқидни унчалик яхши қабул қилмайди. Балки, у ҳамма нарсани биламан”, — дея таъкидлаганди Жозе Испаниядаги фаолиятини тугатгандан кейин.
Аммо бир мунча вақт ўтгач, уларнинг суҳбатлари аста-секин илиқлаша бошлади.
“Роналдуга мураббийлик қилиш фаолиятимдаги энг муҳим воқеа бўлди. У мен учратган энг профессионал футболчи. Мураббий ва футболчи ўртасида маълум бир вақтда келишмовчилик бўлиши мумкин, аммо ҳаммаси шу билан тугайди”, — деди Жозе.
Криштиану бунга жавобан Жозени фаолиятидаги энг яхши мураббий деб атади, ва уни сер Алекс Фергюсондан ҳам юқори ўринга қўйди: “Мен Моуриньони биринчи ўринга қўйган бўлардим”.
Моуриньонинг Португалия терма жамоасига келиши ижобий натижа бериши мумкин. Шу билан бирга, Жозе ҳали ҳам футболчиларга янгилик бера олади. Унинг тактик эслатмалари анча самарали ишлайди.