Наманган вилояти суди томонидан хотинининг укасини ўлдирган эркакка нисбатан ҳукм эълон қилинди. Жиноят аёлнинг бирга яшашни давом эттиришдан бош тортгани туфайли келиб чиққан можаро оқибатида содир бўлган.
Олий суд маълумотларига кўра, воқеа 20 май куни Давлатобод туманида юз берган. Судланувчи турмуш ўртоғини қайтариб олмоқчи бўлиб, унинг ота-онаси яшайдиган уйга борган. Рад жавобидан сўнг қариндошлар билан жанжал келиб чиққан ва жараёнга аёлнинг кенжа укаси ҳам аралашган.
Можаро вақтида судланувчи унга пичоқли қурол қўллаб, оғир тан жароҳати етказган. Жабрланувчи воқеа жойида вафот этган.
Суд эркакни Ўзбекистон Республикаси Жиноят кодексининг 97-моддаси 2-қисми (қасддан одам ўлдириш) билан айбдор деб топди ва 12 йилга озодликдан маҳрум қилиш жазосини тайинлади. У жазони умумий режимдаги колонияда ўтайди.