Расман Ўзбекистон кубоги баҳсларининг 2022 йилги мавсуми якунланди. Ҳал қилувчи баҳсда Наманганнинг “Навбаҳор” ҳамда Қаршининг “Насаф” жамоалари майдонга тушди. Бухоро шаҳри мезбонлик қилган баҳсда “аждарлар” 2:1 ҳисобидаги ғалабани нишонлаб, Ўзбекистон кубогини қўлга киритди. Асосий вақтда кучлар тенг келган бўлса, қўшимча бўлимларда урилган гол эвазига кубок Қаршига кетадиган бўлди. Мазкур ютуқ “Насаф” учун кетма-кет иккинчи, умумий ҳисобда учинчи ғалаба ҳисобланади. Матч жуда қизиқарли ва кескин курашларга бой бўлди.
Ўзбекистон кубоги баҳслари бу йил ўттизинчи маротаба ўтказилди. Бу турнирнинг ўзига хос тарихи ҳам бор. Турнирнинг илк чемпиони айнан “Навбаҳор” жамоаси бўлган. “Пахтакор” 13 марта Ўзбекистон кубогини қўлга киритган энг муваффақиятли клуб ҳисобланади. Иккинчи ўринда “Бунёдкор” 4 та, “Навбаҳор” ва “Локомотив” эса 3 та билан учинчи ўринда. “Насаф” клуби 2021 йилда “Пахтакор”ни мағлуб этиб, ўз тарихидаги иккинчи кубокка эгалик қилганди.
Бевосита кечаги баҳсга тўхталадиган бўлсак, ҳеч бир жамоа яққол устунликка эга чиқмади. Наманганликлар йўқотишларсиз, тўлиқ таркиб билан мазкур ўйинга етиб келганди. Қаршиликлар сафида эса Ҳусайн Норчаев майдонга туша олмаслиги аввалдан маълум эди. Бу, албатта, Рўзиқул Бердиев жамоаси учун катта йўқотиш ҳисобланади. Сабаби, Норчаев жамоасининг “юраги”га айланиб улгурганди. Бердиев бор имкониятдан максимал даражада фойдаланишга ва бунинг ортидан натижа кўрсатишга ҳаракат қиладиган мураббийлар сирасига киради. Бугунги ўйинда ҳам у ўз услубидан чекинмаган ҳолда Ҳусайннинг ўрнини бошқа футболчилар орқали ёпишни уддалади. Ўйин статистикасига қарайдиган бўлсак, икки жамоада ҳам тенглик: 50:50.
Финал баҳси қўшимча бўлимларга қадар давом этди. Бу Ўзбекистон кубоги тарихидаги саккизинчи экстра-таймдир. Қўшимча бўлимларнинг фақатгина 3 таси “футбол лотереяси”гача етиб борган.
“Насаф” бу ғалабаси орқали келаси мавсум тўғридан-тўғри чемпионлар лигасида ўйнаш имкониятига эга чиқди. Қаршиликларнинг ҳозирги таркиби асосан ёшлардан иборат, шаклланган таркиб. Таркибдаги футболчиларнинг деярли барчаси миллий терма жамоа учун номзод ўйинчилардир. Клуб айни дамдаги таркиби билан Осиёда ҳам кураша оладиган кучга эга. Йўналиш ва ўйин тўғри танланса, “Насаф” Осиёнинг гранд клублари қаршилигини енга олади. Осиё чемпионлар лигаси баҳслари ҳамюртларимиз учун трампилин вазифасини ўтаса ҳам ажаб эмас.
Финал баҳсида ўзига хос қарама-қаршиликлар ҳам мужассамлашган эди. Ҳар икки жамоанинг ҳар бир чизиғида Ўзбекистон МТЖ футболчилари тўп сурди. Хусусан, Ўткир Юсупов ва Абдувоҳид Неъматов. Ўтказиб юборилган голларда уларни айблаш ноўрин. Барча голлар ҳимоячиларнинг қўпол хатоси ва жамоанинг маҳорати эвазига вужудга келди. Бу жойда индивидуал маҳорат ҳам рол ўйнади.
Самвел Бабаян шогирдларининг деярли барчаси катта тажрибага эга ўйинчилардир. Қаерда қандай ҳаракат қилишни, қийин вазиятларда тўғри қарор чиқаришни биладиган футболчилар.
Ўзбекистон кубоги финал баҳсида “аждарлар” 8-марта иштирок этаётган бўлса-да, биринчи марта экстра-таймда қатнашмоқда. “Лочинлар” эса биринчи чемпионликни ўзидаёқ қўшимча бўлимларда ўйнаган ва ўшанда “Темирйўлчи” (ҳозирги “Қўқон-1912”) жамоасидан устун келган.
Қаршиликлар асосини ёшлар ташкил этади ва анча йиллардан бери кубок баҳсларида ҳам, чемпионатда ҳам сўнгги онларда қоқиларди. Бироқ, бугунги кунда келиб қаршиликлар мамлакат чемпионлиги билан бирга кубок баҳсларида асосий фаворит ҳисобланади. Энди Бердиев шогирдлари миллий чемпионат ғолиблиги учун курашиши лозим бўлади.