CITESга аъзо давлатларнинг 20-конференцияси доирасида “Табиат лойиҳалари: биоохилма-хилликни сақлаш учун ўрмонларнинг экологик таснифи” мавзусида махсус тадбир ўтказилди. Унда Ўзбекистон ўрмон экотизимларини илмий асосда таснифлаш бўйича ишлаб чиқилган биринчи комплекс тизим жамоатчиликка тақдим этилди. Тадбирда Zamon.uz мухбири иштирок этди.
Тадбирда экология вазири ўринбосари Обиджон Қудратов ва “Яшил лойиҳа” институти директори Олим Ҳакимов Ўзбекистон табиий ресурсларини баҳолаш, экотизимларни мониторинг қилиш ҳамда уларни барқарор бошқаришда илмий ёндашувнинг аҳамиятини таъкидлади.
Янги тизим сунъий интеллект, сунъий йўлдош тасвирлари, GIS маълумотлари ва рақамли картографиялашга асосланиб, нойоб турлар яшайдиган ҳудудларни аниқлаш, экологик хавф хариталарини яратиш ва CITES учун илмий маълумотлар тайёрлаш имконини беради.
Тадбир давомида қуйидаги масалалар муҳокама қилинди:
– экологик таснифнинг нойоб турларни ҳимоя қилишдаги ўрни;
– RESILAND лойиҳаси натижаларини миллий режалаштиришга интеграция қилиш;
– олинган маълумотлардан CITES мониторинги ва ҳисоботида фойдаланиш;
– минтақавий экологик ҳамкорлик;
– маҳаллий ҳамжамиятларнинг табиатни муҳофаза қилишдаги иштироки.
Мутахассисларнинг айтишича, ушбу экологик тасниф Ўзбекистон ўрмонларини барқарор бошқариш ва биоохилма-хилликни самарали ҳимоя қилишда стратегик аҳамиятга эга бўлиб, мамлакатнинг биринчи комплекс рақамли илмий платформасига айланди.