Иқтисодий тадқиқотлар ва ислоҳотлар маркази мутахассислари Ўзбекистонда автомобилсозлик саноатининг 2017-2022 йиллардаги ривожланиш динамикасини тақдим этди.
Қайд этилишича, 2017-2022 йилларда автомобиль ишлаб чиқариш ҳажми 2,3 бараварга кўпайди. Пандемия ва ишлаб чиқариш занжирларидаги узилишларнинг салбий таъсирлари жаҳон автомобиль бозорларида сақланиб қолаётганига қарамай, 2022 йилда Ўзбекистон автомобилсозлик саноатида енгил автомобилларни ишлаб чиқариш ҳажми кескин кўпайиб, 328,1 минг донага етди. Шунингдек, 2022 йилда 4094 дона юк машиналари ва 1357 дона автобуслар ишлаб чиқарилди.
Бугунги кунда автомобилсозлик соҳасида мамлакат ЯИМининг 2022 йилда 1,1 фоиз (2017 йилда - 0,6 фоиз) ва саноат маҳсулотларининг 4 фоиз (2017 йилда - 2,8 фоиз) яратилади.
Шунингдек, 2017 йилда ушбу тармоқда ўртача 23,5 мингга яқин киши иш билан банд бўлган бўлса, 2022 йилга келиб ушбу кўрсаткич 29,2 минг нафарга етган ёки 24,3 фоизга ўсган.