Тошкент шаҳар божхона бошқармаси хабарига кўра, “Чуқурсой” божхона постида йирик миқдордаги ҳуқуқбузарлик ҳолатлари аниқланди.
Унга кўра, хориждан юртимизда фаолият юритувчи масъулияти чекланган жамиятлардан бирининг номига келтирилган товарлар белгиланган тартибда божхона кўригидан ўткзилганда, юклар орасида 5 турдаги 12,5 тонна аёллар соч тўғноғичлари юк кузатув ҳужжатларида кўрсатилмаганлиги аниқланди.
Мазкур товарларнинг қиймати эса 1,5 миллиард сўмни ташкил этмоқда.
Мазкур постда аниқланган навбатдаги ҳолатда эса эркин муомалага чиқариш божхона режимига расмийлаштириш учун тақдим этилган автотранспорт эҳтиёт қисмлари товарлари божхона кўригидан ўтказилди.
Натижада, божхона юк декларациясида автомобиль учун мўлжалланган ён ойналар 312 дона дея кўрсатилган бўлса-да, аслида 2392 дона эканлиги аниқланди.
Мазкур товарларнинг қиймати эса 1 миллиард 76 миллион сўмга баҳоланмоқда.
Ҳозирда мазкур ҳолатлар юзасидан божхона органлари томонидан текширув ва суриштирув ҳаракатлари олиб борилмоқда.