"Манчестер Сити" Пеп Гвардиола қўл остида ўзининг энг ёмон мавсумини ўтказмоқда. Испанияликлар мураббий даврида жамоа ҳеч қачон 17 турдан кейин бунчалик кам очко тўпламаган эди. "Сити" ўйин ва кадрлар билан боғлиқ муаммоларни бошдан кечирмоқда. Шунинг учун клуб қишки трансфер ойнасида бор эътиборини трансфер бозорига қаратади. Хўш, Англия чемпионининг январь ойидаги режалари қандай?
"Манчестер Сити" қишда камдан-кам ҳолларда йирик шартномалар тузади. Охиргиси Хулиан Алваресни 2022 йилнинг январида 21,4 миллион еврога сотиб олган эди (у трансфер вақтида топ футболчи эмас эди). Аммо клубнинг иқтисодий кўрсаткичлари раҳбариятга яқинлашиб келаётган трансфер ойнасида янги футболчилар учун пул ажратиш имконини беради. "Манчестер Сити" ўтган йил давомида 715 миллион фунт даромад қайд этди. Шу сабабдан январь ойида мухлислар жамоадан катта янгиликларни кутмоқда.
"Тhe Telegraph" нашрининг таъкидлашича, раҳбарият жамоани қайта қуришни режалаштирмоқда. Клуб 4-6 нафар футболчини трансфер қилиш ҳақида ўйламоқда. "ESPN" нашрининг хабарига кўра, "Манчестер Сити" қишда ярим ҳимоячи сотиб олади. Асосий вариантлар Мартин Субименди (“Реал Соседад”) ва Бруно Гимарас ("Нюкасл"). Ҳар икки футболчи ҳам жароҳат олган Родрининг ўрнини тўлдиришга қодир эканлиги айтилмоқда. "Independent" нашрининг ёзишича, "Сити" Пол Погбани ҳам олиб келишни кўриб чиқмоқда. Франциялик футболчи эркин агент саналади ва март ойида допинг туфайли дисквалификация қилинган эди. Манбанинг таъкидлашича, Пол Гвардиола жамоаси билан музокара олиб боришни истамаяпти. Бунга франциялик футболчининг "Манчестер Юнайтед" билан ижобий алоқалари сабаб қилиб келтирилган. Инсайдер Фабрицио Романо ҳам клуб ва футболчи музокара олиб бормаётганини айтган.
Гвардиола учун ярим ҳимоячи позициясининг бошқа вариантлари орасида "Аталанта"дан Эдерсон, Эберечи Эзе ("Кристал Пелас"), Матейс Куня ("Вулверхемптон"), шунингдек, Адам Уортон ("Кристал Пелас") ва Теяни Реиндерс ("Милан") бор. “Манчестер Сити” Марк Гуэхи (“Кристал Пелас”) ёки Жеррад Брантуэйт ("Эвертон")ни марказий ҳимоячи позициясига кўриб чиқмоқда. "Daily Mail" нашрининг қайд этишича, Англия чемпионлари Эрлинг Ҳоланд ўрнига янги марказий ҳужумчи ва ўнг қанот ҳимоячиси вариантини ҳам кўриб чиқмоқда. "ТBR Football" нашри "Сити"нинг "Спартак" клуби ҳужумчиси Манфред Угалдега қизиқиши ҳақида хабар берди. Бироқ ҳозирча маълумот тасдиқланмаган. Гвардиола эса "Манчестер Юнайтед" билан ўйин олдидан ўтказилган матбуот анжуманида клуб бир қатор харидларни амалга ошириш ҳақида ўйлаётганини тасдиқлади.
“Мен футболчиларимни қайтаришни хоҳлайман. Доим айтиб келаман, менга янги футболчилар эмас, ўзимнинг футболчиларим керак. Аммо, мавсум қизиган вақтда биз янги келишувлар ҳақида ўйлашга мажбур бўляпмиз".
Испаниялик мураббий муваффақиятли молиявий кўрсаткичларни ҳам алоҳида таъкидлаб ўтган: "Раҳбариятни даромад бўйича навбатдаги рекорд мавсум билан табриклайман. Аммо, бу бизга янги футболчилар керак эмаслигини англатмайди".
"Аtletik" нашрининг хабар беришича, "Манчестер Сити" етакчиларининг клубдан кетишини истисно қилмаяпти. Масалан, жамоа Кайл Уокер, Кевин Де Брюйне, Эдерсон, Жек Греалиш ва Рубен Диас билан хайрлашиши мумкин.