Таиланд ва Камбоджа ўртасидаги кескинлашган чегара низоси ортидан ҳар икки давлат ўт очишни тўхтатиш бўйича келишувга эришди. Бу ҳақда Малайзия Бош вазири Анвар Иброҳим расмий баёнот берди.
Малайзия таклиф қилган сулҳ ташаббусига Таиланд розилик билдирганини маълум қилди. Бироқ Бангкок расмийлари шартномани амалга ошириш "ҳудуддаги реал шароитларга боғлиқ бўлишини" қайд этишди. Анвар Иброҳимнинг айтишича, томонлар келишувга эришган бўлсада, ҳарбийлар жойларда тургани сабабли кучларни олиб чиқиш учун бироз вақт сўралган.
Сўнгги икки кун ичида Таиланд ва Камбоджа чегарасида юзага келган қуролли низо камида 20 кишининг умрига зомин бўлди. 130 мингдан ортиқ аҳоли хавфсиз ҳудудларга эвакуация қилинди. Ҳар икки томон бир-бирини можаро бошланишида айбламоқда. Таиланд ҳарбийлари Камбоджани БМ-21 ракета тизими билан тинч аҳоли пунктларига зарба берганликда айблади.
Камбоджа ҳукумати Таиландни кластер бомбалардан фойдаланганликда айблаб, бу халқаро ҳуқуқнинг жиддий бузилиши эканини таъкидлади. Таиланд эса бу қуроллардан ҳарбий нишонларга нисбатан "пропорционаллик принтсипи" асосида фойдаланганини билдирди. Шунингдек, жанглар натижасида Preah Vihear тарихий ёдгорлигига зарар етгани айтилмоқда — бу маълумот Таиланд томонидан рад этилди.
Марказий Осиё стратегик тадқиқотлар маркази эксперти Андрейка Наталегавага кўра, ҳар икки давлат тўлиқ урушни кўтармайди. У можарони ҳал этиш учун нейтрал кузатувчи ёки учинчи томон аралашуви зарурлигини таъкидлади. ASEAN тарихида илк марта икки аъзо давлат ўртасида бундай даражадаги ҳарбий тўқнашув кузатилмоқда. Бу эса минтақавий ташкилот учун жиддий синов бўлмоқда.