Тошкентдан Жиддага учаётган самолёт фавқулодда қўнди
Парвоз давомида йўловчида такрорий инфаркт содир бўлган.
Маълум қилинишича, UZS4003 Тошкент – Жидда рейси бортда юзага келган фавқулодда тиббий ҳолат сабабли Баҳрайн аэропортига мажбурий қўнишни амалга оширди. Бу ҳақида “Air Samarkand” авиакомпанияси хабар қилди.
Парвоз давомида 75 ёшли йўловчида такрорий инфаркт содир бўлган. Самолёт бортида бўлган шифокор беморнинг ҳаёти хавф остида эканлигини тасдиқлади.
Ҳаво кемаси командири Таланов Роман Игоревич бошчилигидаги Air Samarkand экипажи тезкор қарор қабул қилиб, беморга зарурий тиббий ёрдам кўрсатиш учун Баҳрайнга фавқулодда қўнишга қарор қилди.
Борт кузатувчилари шифокор билан биргаликда бортдаги тиббий қутилар ва ускуналар ёрдамида беморга биринчи ёрдам кўрсатди. Аэропортда бемор барқарор ҳолатда тез ёрдам бригадасига топширилган.
Маълумот ўрнида, рейс тахминан 1 соат кечикиш билан Жиддага давом этади.
