АҚШ президенти Доналд Трамп ва Исроил бош вазири Бинямин Нетаньяҳу Оқ уйда ёпиқ эшиклар ортида учрашув бошлади. Музокаралар оммавий ахборот воситалари иштирокисиз ўтказилмоқда.
Оқ уй вакили Овал кабинетдаги учрашув бошланганини тасдиқлади. Ҳозирча учрашув якунида журналистларга рухсат бериладими ёки музокаралар тўлиқ ёпиқ шаклда қоладими — бу номаълум.
Нетаняҳунинг кортежи учрашувдан олдин кучайтирилган хавфсизлик остидаги кўча орқали Оқ уйга етиб келгани кузатилган. У Вашингтонга келганидан сўнг, сешанба куни Эрон билан музокараларда иштирок этаётган АҚШнинг юқори мартабали вакиллари билан ҳам ёпиқ тарзда учрашув ўтказган.
Мазкур музокараларда АҚШнинг махсус вакили Стив Уиткофф ва Трампнинг куёви ҳамда норасмий маслаҳатчиси Жаред Кушнер иштирок этган. Улар Эрон билан давом этаётган музокараларнинг асосий вакиллари ҳисобланади. Музокараларнинг биринчи босқичи ўтган ҳафта Уммон давлатида бўлиб ўтган.
Шунингдек, чоршанба куни Нетаньяҳу АҚШ давлат котиби Марко Рубио билан ёпиқ учрашувда Трамп ташаббуси билан тузилган “Тинчлик кенгаши” таркибига қўшилган. Ушбу ташаббус Ғазо секторида тинчликни таъминлаш ва ҳудудни тиклашга кўмаклашиш мақсадида йўлга қўйилган.
Маълум қилинишича, кенгашнинг илк етакчилар даражасидаги йиғилиши 19 февраль куни Вашингтонда ўтказилиши режалаштирилган. Унда Ғазони тиклаш учун маблағ йиғиш масаласи асосий мавзулардан бири бўлиши кутилмоқда.