Туркия парламенти Швециянинг НАТОга кириши ҳақидаги протоколни кўриб чиқиш тартибини тезлаштириш ниятида эмас. Бу ҳақда Ташқи ишлар комиссияси раҳбари Фуат Ўқтой маълум қилди.
Ўқтойнинг сўзларига кўра, Швециянинг НАТОга аъзолиги ҳақидаги протокол бошқа барча ҳужжатлат билан бир хил, шунинг учун уни кўриб чиқиш комиссия тартибига мувофиқ амалга оширилади.
“Тегишли делегациялар бу жуда шошилинч дейишса ҳам, сиз учун зарур бўлган нарса биз учун, комиссиямиз ёки парламентимиз учун шошилинч бўлиши шарт эмас. Парламент буни кун тартибига мувофиқ амалга оширади”, — деб тушунтирди депутат.
Аввалроқ ОАВ Туркия Швециянинг НАТОга киришини 2024 йилгача кечиктиришга тайёрланаётгани ҳақида ёзган эди.