Украина билан давом этаётган уруш Россияда ногиронлар сонининг кескин ошишига сабаб бўлди. The Moscow Times ёзишича, бу кўрсаткич Псков ёки Жанубий Сахалин аҳолиси сонига тенг бўлган “ногиронлар армияси” пайдо бўлганини англатади.
Россия Ижтимоий жамғармаси маълумотларига кўра, мамлакатда 2023–2024 йиллар мобайнида ногиронлар умумий сони 190 минг нафарга кўпайган. Ўтган йил якунига келиб, Россияда ногиронлар сони 11 миллион 122 минг кишига етган — бу кўрсаткич 2023 йилда 11,04 миллион, 2022 йилда эса 10 миллион 932 минг нафардан иборат эди. Мутахассислар буни 2007 йилдан буён энг юқори ўсиш суръати сифатида баҳоламоқда.
Халқаро стратегик тадқиқотлар институти (ИИСС) ҳисоб-китобларига кўра, 2024 йилнинг охирига келиб, 376 минг россиялик жанг майдонида оғир жароҳатлар натижасида ногирон бўлиб қолган. Институтнинг умумий баҳосига кўра, Россия армиясининг 2022–2024 йиллардаги йўқотишлари қарийб 783 минг кишини ташкил этган. Улардан тахминан 172 минг нафари ҳалок бўлган, 611 минг киши эса жароҳатланган. Жароҳат олганларнинг 235 минг нафари тузалиб кетган бўлса, қолган қисми умр бўйи ногиронлик даражасига эга бўлган.