Венгрия Европа кенгаши томонидан Украинага макромолиявий ёрдам ажратиш бўйича тузатишлар қабул қилинишини қўллаб-қувватламайди. Бу ҳақда мамлакат Молия вазирлиги раҳбари Михали Варга Брюсселда ўтган Иқтисодий ва молиявий масалалар бўйича кенгаш йиғилишида маълум қилди.
“Венгрия молия қонунчилигига ўзгартириш киритишга қарши”, - деди у.
Литва молия вазири Гинтаре Скаисте бу қарорни ахлоқсиз деб атади.
“Венгриянинг Украинага ёрдам бермаслиги ва уни бошқа даражадаги муаммолар билан боғлаши қайсидир маънода ахлоқсизликдир”, деди вазир журналистларга.
Ноябр ойида Европарламент Украинага 18 миллиард евролик молиявий ёрдам кўрсатиш бўйича янги лойиҳани маъқуллади. Ёрдам имтиёзли узоқ муддатли кредитлар бериш, муҳим инфратузилмани таъмирлаш ва ҳарбий ҳаракатлар тугаганидан кейин мамлакатни тиклашни ўз ичига олган. Президент Владимир Зеленский Украинани тиклаш учун 1 триллион доллардан ортиқ маблағ кераклигини айтган.