Россиялик олимлари сурункали юрак етишмовчилигини тери орқали аниқлаш усулини ишлаб чиқишди. Бу ҳақда “Янги Ўзбекистон” нашри ёзмоқда.
Тадқиқотчилар терини лазер воситасида нурлантиришга асосланган мазкур ташхис қўйиш усули мавжуд инвазив усулларга муқобил бўлишига ишонишмоқда.
ЖССТ маълумотларига кўра, юрак-қон томир касалликлари ҳар йили дунё бўйича 20 миллионга яқин одам ўлимига олиб келади. Буларга сурункали юрак етишмовчилиги киради – бу касалликда тананинг қон ва тўқималари кислород билан тўлиқ тўйинмайди.
Шу билан бирга, касалликнинг дастлабки босқичи аломатларсиз давом этади, шунинг учун сурункали юрак етишмовчилигида беморга кўпинча зарур тиббий ёрдам кўрсатиш қийин бўлган оғир ҳолатларда ташхис қўйилади.
Самара университети олимлари бошқа олий ўқув юртидаги ҳамкасблари билан биргаликда оптик усул ёрдамида сурункали юрак етишмовчилигини ташхислаш имконини берувчи сенсорни ишлаб чиқишга муваффақ бўлишди.
Бу қўшимча реагентлардан фойдаланмасдан сурункали юрак етишмовчилигини аниқлашнинг дунёдаги биринчи усули ҳисобланади.
Лазер бемор билагининг ички томонида таъсир кўрсатади, терига кириб боради, радиация тўқималар билан ўзаро таъсирланганда ўз энергиясини ўзгартиради. Ўзгаришлар махсус зонд ёрдамида қайд этилади, инсон терисининг спектраль профили аниқланади. Ушбу маълумотлар машина усули ёрдамида таҳлил қилинади, бу сурункали юрак етишмовчилиги мавжудлиги борасида аниқ ташхис қўйиш имконини беради.
