Joriy yilning 20 dekabr kuni Toshkent shahridagi “Turkiston” sanʼat saroyida mamlakat ilm-fan jamoatchiligi uchun eng kutilgan va eng tantanali voqea – “SCIENCE AND INNOVATION AWARDS – 2025” tadbiri bo‘lib o‘tadi. Har yili anʼanaviy tarzda o‘tkaziladigan ushbu nufuzli marosim bu yil to‘rtinchi marotaba o‘tkazilmoqda.
Tadbir “SCIENCE AND INNOVATION” kompaniyasi tomonidan tashkil qilinadi. Bu yilgi taqdirlash marosimida O‘zbekistonda ilm-fan, taʼlim va innovatsiyalar rivojiga salmoqli hissa qo‘shgan olimlar, oliy taʼlim muassasalari va ilmiy tashkilotlar o‘rtasida quyidagi nominatsiyalar bo‘yicha g‘oliblar aniqlanadi:
1. “Yil olimi – 2025” – Ilm-fan taraqqiyotiga beqiyos hissa qo‘shgan, yirik ilmiy natijalarga erishgan yetuk olimga taqdim etiladi.
2. “Yilning eng yaxshi oliy taʼlim muassasasi” – Ilmiy faoliyat, innovatsion o‘qitish va xalqaro reytinglarda yuqori natijalarga erishgan davlat oliy taʼlim muassasasiga beriladi.
3. “Yilning eng yaxshi nodavlat oliy taʼlim muassasasi” – Taʼlim sifati, ilmiy izlanishlar va amaliyotga yo‘naltirilgan faoliyati bilan ajralib turgan nodavlat oliy taʼlim muassasasiga topshiriladi.
4. “Yilning eng yaxshi ilmiy tadqiqot instituti” – Fundamental va amaliy tadqiqotlarda yuqori natijalar ko‘rsatgan, innovatsion ishlanmalar muallifi bo‘lgan ilmiy tashkilotga beriladi.
5. “Yilning eng innovatsion universiteti” – Raqamli texnologiyalar, startaplar va innovatsion taʼlim loyihalarini joriy etishda ilg‘or yutuqlarga erishgan universitetga taqdim etiladi.
Mazkur marosimda O‘zbekiston fanining nufuzli vakillari — akademiklar, professor olimlar, shuningdek, xorijiy mehmonlar va iqtidorli yosh tadqiqotchilar qatnashadi.