Yevropa Ittifoqi joriy qish uchun yetarli miqdorda gaz zaxirasini olishga muvaffaq bo‘ldi, biroq kelgusi yil Rossiya gaz yetkazib berishni qisqartirishda davom etsa, yana taqchillik yuzaga kelishi mumkin. Bu haqda 12 dekabr, dushanba kuni bo‘lib o‘tgan matbuot anjumanida Yevrokomissiya rahbari Ursula fon der Lyayen Xalqaro energetika agentligi maʼlumotlariga tayangan holda maʼlum qildi.
«Biz qilgan barcha ishlarimizga qaramay, kelasi yil biz hali ham 30 milliard kub metr gaz tanqisligiga duch kelishimiz mumkin», — dedi Ursula fon der Lyayen.
Uning so‘zlariga ko‘ra, YEI byudjetni qayta ko‘rib chiqishi va Rossiya gazidan foydalanishdan butunlay voz kechish uchun yirik energetika sarmoyalari uchun alohida fond yaratish haqida o‘ylashi kerak. Yevrokomissiya rahbari bu maqsad uchun YEI yangi qo‘shma qarzni o‘z zimmasiga olishi kerak yoki yo‘qligiga aniqlik kiritmadi, biroq blok byudjetiga «boshqa manbalardan qo‘shimchalar kiritish» zarurligini qo‘shimcha qildi.