Ijtimoiy tarmoqlarda Andijon viloyatining Marhamat tumanida bir guruh shaxslar mast holatda janjallashganligi aks etgan video tarqalib, uning izohida mazkur holat bo‘yicha qonuniy chora ko‘rish so‘ralgandi. Holatga viloyat IIB axborot xizmati rasmiy munosabat bildirdi.
aniqlanishicha, videoda aks etgan holat 2025 yilning 27 iyul kuni soat 18:58 da Marhamat tumani O‘zbekiston mahallasi Buyuk turon ko‘chasida joylashgan salqin ichimliklar do‘konida sodir bo‘lgan.
Fuqaro A.A. mast holatda do‘kon egasi A.B. bilan o‘zaro gap tortishib qolishi oqibatida o‘rtada janjal kelib chiqqan.
Sud-tibbiy ekspertizalarining tegishli xulosalarida fuqaro A.B.da sog‘liqning qisqa muddatga buzilishiga olib kelmaydigan yengil tan jarohati aniqlanganligi, fuqaro A.A.da esa tan jarohatlari aniqlanmaganligi ko‘rsatilgan.
“Mazkur holat yuzasidan Marhamat tumani IIB tomonidan tergovga qadar tekshiruv yakuni yuzasidan qonuniy qaror qabul qilinishi taʼminlanadi”, deyiladi rasmiy izohda.