Belgilangan tartibga ko'ra bemorlarga tayinlanadigan dori vositalari haqidagi barcha ma’lumotlar elektron retsept shaklida bevosita shifokor tomonidan kiritiladi hamda elektron tasdiqlash usullari orqali rasmiylashtiriladi.
Elektron retsept asosida beriladigan dori vositalari ro‘yxatini shakllantirish maqsadida Sog‘liqni saqlash vaziri buyrug‘i bilan maxsus Ekspertlar kengashi tashkil etiladi.
Elektron retsept asosida dori vositalarini tayinlashning birinchi bosqichida quyidagi dori vositalari elektron shaklda rasmiylashtiriladi:
- antibiotiklar va tizimli ta’sir etuvchi sintetik antibakterial dori vositalari;
- tizimli ta’sir etuvchi gormonal dori vositalari.
Shuningdek, Sog‘liqni saqlash vazirligi huzurida tashkil etilgan 1003 qisqa raqamli Call-markaz orqali yotoq rejimidagi hamda surunkali kasalliklarga chalingan bemorlar uchun qo‘shimcha qulayliklar yaratiladi. Xususan, mazkur bemorlar:
- o‘zlari biriktirilgan oilaviy shifokorga masofadan murojaat qilish;
- davolash kursini davom ettirish maqsadida oilaviy shifokor yoki tor soha mutaxassisiga murojaat qilib, elektron retsept olish imkoniyatiga ega bo‘ladi.