AQSH prezidenti Jo Bayden boshqa davlatlar vakillariga ukrainalik uchuvchilarni Amerika F-16 qiruvchi samolyotlarini boshqarishga o‘rgatishlariga ruxsat berdi. Bu haqda Pentagon matbuot kotibi o‘rinbosari Sabrina Singx matbuot brifingida maʼlum qildi.
"Prezident mashg‘ulotlarga ruxsat berish va uni qo‘llab-quvvatlash uchun yashil chiroq yoqdi", — dedi AQSH Mudofaa vazirligi vakili.
Rasmiy boshqa maʼlumot bermadi, lekin Daniya va Gollandiya ukrainalik uchuvchilarni tayyorlashda yetakchi rol o‘ynashini taʼkidladi.
Ma'lumot uchun, 2023-yil boshidan beri Ukraina hukumati G‘arb davlatlaridan Ukrainaga zamonaviy qiruvchi samolyotlar, jumladan, Amerika F-16 samolyotlari yetkazib berishni boshlashni faol so‘ramoqda. Iyul oyida AQSH Milliy xavfsizlik kengashining strategik aloqalar bo‘yicha koordinatori Jon Kirbi Ukraina samolyotni yil oxirigacha olishi mumkinligini aytgan edi .
Shuningdek, iyul oyida Daniya va Niderlandiya boshchiligidagi 11 davlatdan iborat koalitsiya ukrainalik uchuvchilarni F-16 samolyotlarida uchishini o‘qitishni boshlashga tayyorligini, biroq AQSHning rasmiy ruxsatisiz buni amalga oshira olmasligini xabar qilgan edi.