Qatar AQShning Afg‘onistondagi manfaatlarini ilgari suradi. Bu haqda “Reuters” agentligi xabar qildi.
Agentlik manbasi so‘zlariga ko‘ra, Qatar Afg‘onistonda qolib ketgan AQSh fuqarolariga konsullik xizmati ko‘rsatadi va Vashingtonning ushbu mamlakatda manfaatlarini ilgari suradi. AQSh manfaatlari bo‘limi Kobuldagi sobiq elchixona binosida joylashadi.
Taʼkidlanishicha, Doha Vashingtonga toliblar bilan aloqalarni saqlab turishga yordam beradi.
Qatar — Afg‘onistondagi siyosiy hayotda va "Tolibon" tashqi siyosatida katta ahamiyatga ega davlat. Xususan, harakatning siyosiy ofisi aynan Dohada joylashgan. Bundan tashqari, AQSh va toliblar o‘rtasida kelishuv imzolanishida ham Qatar muhim o‘rin tutgan. Shuningdek, afg‘on fuqarolarini evakuatsiya qilishda bu davlat eng asosiy tranzitlardan biri hisoblanadi.
Avvalroq Qatar Kobul aeroportini boshqarishda yordam berishi to‘g‘risida xabar qilingandi.
Jahongir Qo'ziyev