АҚШнинг Афғонистондаги манфаатларини қайси давлат илгари суриши маълум бўлди
Бу ҳақда тегишли шартнома имзоланган.
Қатар АҚШнинг Афғонистондаги манфаатларини илгари суради. Бу ҳақда "Reuters" агентлиги хабар қилди.
Агентлик манбаси сўзларига кўра, Қатар Афғонистонда қолиб кетган АҚШ фуқароларига консуллик хизмати кўрсатади ва Вашингтоннинг ушбу мамлакатда манфаатларини илгари суради. АҚШ манфаатлари бўлими Кобулдаги собиқ элчихона биносида жойлашади.
Таъкидланишича, Доҳа Вашингтонга толиблар билан алоқаларни сақлаб туришга ёрдам беради.
Қатар — Афғонистондаги сиёсий ҳаётда ва "Толибон" ташқи сиёсатида катта аҳамиятга эга давлат. Хусусан, ҳаракатнинг сиёсий офиси айнан Доҳада жойлашган. Бундан ташқари, АҚШ ва толиблар ўртасида келишув имзоланишида ҳам Қатар муҳим ўрин тутган. Шунингдек, афғон фуқароларини эвакуация қилишда бу давлат энг асосий транзитлардан бири ҳисобланади.
Аввалроқ Қатар Кобул аэропортини бошқаришда ёрдам бериши тўғрисида хабар қилинганди.
Жаҳонгир Қўзиев
