7-avgust kuni Bolgariyaning Sozopol shahridagi Kavatsite sohilida fojiali hodisa yuz berdi. Toshkent viloyatida istiqomat qiluvchi, 2003-yilda tug‘ilgan O‘zbekiston fuqarosi J.M. halok bo‘ldi.
Dastlabki ma’lumotlarga ko‘ra, voqea yosh yigitning ukrainalik qizni cho‘kib ketishdan qutqarishga urinish jarayonida sodir bo‘lgan. Qutqaruv chog‘ida kuchli to‘lqinlar ta’sirida u nazoratni yo‘qotgan va suv ostidagi yirik qoyalarga qisilib qolgan.
O‘zbekistonning Istanbuldagi Bosh konsulxonasi va Bolgariyadagi Faxriy konsulligi mazkur holat yuzasidan mahalliy huquqni muhofaza qilish organlari, qutqaruv xizmatlari hamda Bolgariya Favqulodda vaziyatlar vazirligi bilan doimiy aloqada ish olib bormoqda.
Burgas viloyati, Sozopol shahar hokimiyati va qutqaruv xizmatlari bergan so‘nggi ma’lumotlarga ko‘ra, kuchli to‘lqinlar bois marhum jasadini qoyalardan chiqarish ishlari hanuz davom etmoqda.