Surxondaryo viloyatining Boysun tumanida 1 tonnadan ortiq iste’molga yaroqsiz go‘sht mahsuloti aniqlandi. Bu haqda viloyat Ichki ishlar boshqarmasi xabar qildi.
Qayd etilishicha, Boysun tumani hududida o‘tkazilgan nazorat reyd tadbirlari davomida Buxoro viloyatida yashovchi fuqaro M.K. boshqaruvidagi “Caddy Trendliny” rusumli avtotransport vositasida veterinariya-sanitariya talablariga zid ravishda hech qanday hujjatlarsiz jami 800 kg va Qashqadaryo viloyati Koson tumanida yashovchi S.X.ga tegishli bo‘lgan “Damas” rusumli avtomashinada 600 kg jami 1 400 kg go‘sht mahsulotlarini hech qanday veterinariya hujjatlarisiz Surxondaryo viloyati hududida faoliyat yuritayotgan dehqon bozorlariga olib kelayotgan vaqtida to‘xtatilgan. Ular viloyat Oziq-ovqat xavfsizligi va nazorati bo‘limi labaratoriyasi tekshiruvidan o‘tkazilib, egalariga nisbatan O‘zbekiston Respublikasi ma’muriy javobgarlik to‘g‘risidagi kodeksning 109-moddasiga asosan ma’muriy bayonnoma rasmiylashtirilib, jarima qo‘llanilgan.