Бойсунда 2 машина сифатсиз гўшт аниқланди
Улар бозорга олиб кетилаётган вақтда тўхтатиб қолинган.
Сурхондарё вилоятининг Бойсун туманида 1 тоннадан ортиқ истеъмолга яроқсиз гўшт маҳсулоти аниқланди. Бу ҳақда вилоят Ички ишлар бошқармаси хабар қилди.
Қайд этилишича, Бойсун тумани ҳудудида ўтказилган назорат рейд тадбирлари давомида Бухоро вилоятида яшовчи фуқаро М.К. бошқарувидаги “Caddy Trendliny” русумли автотранспорт воситасида ветеринария-санитария талабларига зид равишда ҳеч қандай ҳужжатларсиз жами 800 кг ва Қашқадарё вилояти Косон туманида яшовчи С.X.ga тегишли бўлган “Damas” русумли автомашинада 600 кг жами 1 400 кг гўшт маҳсулотларини ҳеч қандай ветеринария ҳужжатларисиз Сурхондарё вилояти ҳудудида фаолият юритаётган деҳқон бозорларига олиб келаётган вақтида тўхтатилган. Улар вилоят Озиқ-овқат хавфсизлиги ва назорати бўлими лабараторияси текширувидан ўтказилиб, эгаларига нисбатан Ўзбекистон Республикаси маъмурий жавобгарлик тўғрисидаги кодекснинг 109-моддасига асосан маъмурий баённома расмийлаштирилиб, жарима қўлланилган.
